Young People and Politics

Opinion di ami komo hóben despues di a sa ku ta e tempu ideal pa hóbennan haña un ròl impotantisimo den polítika!!
Auteur: Riglène Cristina

Hasi polítika ta nifiká hiba dilanti nos proyektonan. Pa por logra esaki mester di suidadano di e pais ku tin konvikshon, ideologia, prinsipio y ku ta rekonosé e estado komo hèrmènt pa por hasi esaki.

E sosiedat ta esun enkargá pa "reverse" tur e akshon nan aki den su kòntra i É ta esun ku tin ku reuní e kondishon nan pa aktuá konhuntamente den funkshon di e realidat den kual nos ta biba.

Nos tin e derechi di vota i di ser skohe. Por lo tantu tin ku siña usa i duna e importansha ku nos meresé, tantu e derechi di biba i esun di libertat di ekspreshon.

Nos tin ku tuma konsenshi y tin balor pa lucha pa nos konvikshonnan. Si nuin hende no por konbensé mi, AMI mester ta esun ku por tuma e interes di mi rumannan, lucha pa nan ta mihó i huntu logra e bienestar ku nos ke.

E uniko forma pa satisfasé e nesesidat di un sosiedat kompletu, ta ku e sosiedat mes tin ku lanta for di soño. Si algu sali nos di malu, nos mes tin ku asumí nos responsabilidat i no kulpa otronan di fayonan ku NOS kometé. Un fout ta di nos tur i no solamente di e polítikonan paso ta pesei nos a vota pa nan. E kos ariba menshona ta un "push" pa kuminsá mehorá nos mes komo pèrsona i komo sosiedat.

Nos ku a wòrdu eduká, mester tin e deber di yuda eduká, di transmití nos konosementunan i sembra esaki for di kaminda ta toka nos di biba nos prinsipionan i balornan humanista pa kosechá den un futuro personanan kapas ku ta duna nos sosiedat e kambio ku nos meresé.
Nada ni nuin hende lo hasi é miho ku nos mes, ni e polítikonan ni e empresarionan ets. ets... Nos tambe ta forma parti di e kurpa, i nos tambe tin un mishon.

Hasi polítika mester ta un tarea diario di nos kada unu. Relashoná esaki dirèkt ku un mayor i su yu . Trata di hasi polítika ku e mesun amor ku bo ta lanta un yu i asumí e responsabilidat pa dun'é e mihó destino.