Den e periodo ku nos tabata organisando Young People and Politics Seminar nos a hanja e oportunidad di sera konosi ku hopi hende. Un di nan tabata Sra. Mena van West. Te ku dia 19 di april 2009, e dia ku nos a sera konosi ku Sra. Mena, nos no ta tin niun idea ken Sra. Mena tabata i kon importante su rol den nos historia politika ta.Sra. Mena tabata un di e Damanan di Djarason ku a kana di kas pa kas pa asina logra derechi di voto pa hende muhe na Korsou na anja 1948 i tambe sinja nos hendenan muhe tokante politika. Tambe Sra. Mena tabata un di e prome muhenan riba un lista politiko na anja 1951.
Nos ta hopi agradesi ku nos ta tin e oportunidad di topa ku Sra. Mena. Nos ta hopi kontentu ku e dia ei nos a puntra Sra. Mena si e kier a saka un potret ku nos. Pa nos e potret aki ta un simbolo di kontinuidat di desaroyo humano pa mira Sra. Mena, ku a lucha pa hende muhe hanja derechi di voto, huntu ku nos, hobennan profeshonal, hende muhe ku e ambishon pa un dia yuda goberna nos pais.
Nos ta spera ku nos tambe por tin e kurashi ku Sra. Mena i tur e otro Damanan di Djarason tabata tin pa trese kambio den politika na Korsou. Nos profundo kondelensia na famia di Sra. Mena van West i na tur hende ku di un manera of otro Sra. Mena van West a inspira.
Sra. Mena, danki pa inspira nos. Drumi dushi.
Geen opmerkingen:
Een reactie posten